Բարրի-ն այցելեց Ավետիք Իսահակյանի Տուն-Թանգարանը Գյումրիում

Բարրի-ն այցելեց Ավետիք Իսահակյանի Տուն-Թանգարանը Գյումրիում
2 տարի առաջ

Մեր պատմության մեջ իրականացրել ենք մի շարք միջոցառումներ, որոնցից շատերն ունեցել են բարեգործական միտում: Նմանատիպ միջոցառումներից մեկը վերջերս իրականացրած այցելությունն էր Գյումրիում գտնվող Ավետիք Իսահակյանի տուն-թանգարան: Այցելության նպատակը տուն-թանգարանին համակարգչի նվիրատվությունն էր, և այսպիսով վերջինիս հնարավորություններին ու զարգացմանը նպաստելը: Գաղափարն իրագործվեց բարերար Սարգիս Բադալյանի գլխավորությամբ կազմակերպած դրամահավաքի շնորհիվ։ Հաճախակի տրվող հարցերից մեկն էր, թե ինչպես եկանք նման որոշման, որին ի պատասխան պարոն Բադալյանն ասաց. «Երբ այցելեցինք Գյումրու Ավետիք Իսահակյանի տուն-թանգարան, հարց առաջացավ, թե ինչու հայաբնակ և օտարերկրյա հասարակությունը տեղեկացված չէ նման հիասքանչ թանգարանի մասին, և ինչպես է ստացվել, որ, ունենալով բազում հետաքրքիր նյութեր, դրանք տարածված չեն համացանցում: Պարզեցինք, որ թանգարանի ողջ հարստությունը համացանցում չներկայացնելու միակ պատճառը համակարգչի բացակայությունն էր: Այդպիսով որոշում կայացրինք տուն-թանգարանին համակարգիչ նվիրելու պատասխանատվությունը վերցնել մեզ վրա»:

Այս օրը հիշվեց ևս մեկ բարի և ազգօգուտ գործով, և ինչպես տուն-թանգարանի տնօրեն Կարինե Վիրաբյանը նշեց՝ մեջբերելով մեծն բանաստեղծի խոսքը․ «Մարդն այնքան մեծ է, որքան նա ընդունակ է սիրել ուրիշներին»։